નવી દિલ્હી.
India vs Sri Lanka: ભારતનો વાઇસ કેપ્ટન શુભમન ગિલ ટીમના મુખ્ય કોચ ગૌતમ ગંભીરનો ફેન બની ગયો છે. શ્રીલંકા સાથેની T20 શ્રેણી પહેલા પ્રેસ કોન્ફરન્સમાં તેણે નવા કોચની દિલથી પ્રશંસા કરી હતી. શ્રીલંકા સામેની ટી-20 શ્રેણીમાં સૂર્યકુમાર યાદવ સુકાની રહેશે અને વનડે શ્રેણીમાં રોહિત શર્મા કેપ્ટન રહેશે. આ બંને શ્રેણીમાં શુભમન ગિલ વાઇસ કેપ્ટન રહેશે.
T20 વર્લ્ડ કપમાં ભારતની ખિતાબ જીત સાથે, તત્કાલિન કોચ રાહુલ દ્રવિડનો કાર્યકાળ સમાપ્ત થઈ ગયો. હવે તેનું સ્થાન ગૌતમ ગંભીરે લીધું છે. ભારતીય ટીમ ગૌતમ ગંભીરના કાર્યકાળમાં પ્રથમ T20 શ્રેણી રમવા માટે તૈયાર છે. શ્રેણી પહેલા શુભમન ગિલે કહ્યું હતું કે, ‘અમે વર્લ્ડ ચેમ્પિયન છીએ અને એ જ સ્ટાઈલમાં પ્રદર્શન કરીશું. આશા છે કે નવા કોચિંગ સ્ટાફ સાથે પણ સફળતા મળશે.
ગિલે કહ્યું, ‘હું તેની (ગંભીર) સાથે પહેલીવાર કામ કરી રહ્યો છું. માત્ર બે નેટ સેશનમાં જ સ્પષ્ટ થઈ ગયું કે તેમના વિચારોમાં ઘણી સ્પષ્ટતા છે. તે જાણે છે કે તેણે કયા ખેલાડી સાથે ક્યારે અને કયા પાસાં પર કામ કરવાનું છે.
જ્યારે તેને વાઇસ કેપ્ટનશિપના દબાણ વિશે પૂછવામાં આવ્યું ત્યારે તેણે કહ્યું, ‘તેનાથી કોઈ ફરક પડતો નથી. જ્યારે હું બેટિંગ કરવા ઉતરું છું ત્યારે મારું લક્ષ્ય સારું પ્રદર્શન કરીને ટીમ માટે મેચ જીતવાનું હોય છે. ફરક માત્ર એટલો છે કે જ્યારે તમે કેપ્ટન કે વાઈસ-કેપ્ટન હો ત્યારે મેદાન પર વધુ નિર્ણયો લેવા પડે છે.
