નવી દિલ્હી, સોમવાર
NEET-UG 2024 : NEET UG પરીક્ષાનો મામલો સુપ્રીમ કોર્ટમાં પહોંચ્યો છે. સુપ્રીમ કોર્ટમાં એક અરજી દાખલ કરીને પેપર રદ કરીને ફરીથી પરીક્ષા યોજવાની વિનંતી કરવામાં આવી છે. અરજદારોનો આરોપ છે કે પેપર લીક થયું હતું અને તેમાં મોટા પાયે ગોટાળો થયો હતો.
NEET પરીક્ષામાં ગેરરીતિઓનો આક્ષેપ કરીને, સુપ્રીમ કોર્ટને NEET UG 2024 પરિણામ પાછું ખેંચવા અને પરીક્ષા ફરીથી યોજવા વિનંતી કરવામાં આવી છે. સુપ્રીમ કોર્ટમાં એક અરજી દાખલ કરવામાં આવી છે જેમાં કહેવામાં આવ્યું છે કે NEET પરીક્ષામાં મનસ્વી રીતે ગ્રેસ આપવામાં આવ્યો છે અને તેના કારણે એક જ કેન્દ્રના 67 વિદ્યાર્થીઓને 720 જેટલા જ માર્ક્સ મળ્યા છે. આ મામલાની SIT તપાસ માટે વિનંતી કરવામાં આવી છે.
અરજીમાં ગંભીર આક્ષેપો કરાયા છે
સુપ્રીમ કોર્ટમાં દાખલ કરાયેલી અરજીમાં કહેવામાં આવ્યું છે કે નેશનલ ટેસ્ટિંગ એજન્સીએ ગ્રેસ નંબર આપ્યા છે અને આ બધું પક્ષપાતી છે અને કેટલાક વિદ્યાર્થીઓને બેકડોર એન્ટ્રી આપવા માટે કરવામાં આવ્યું છે. શંકા વ્યક્ત કરતા અરજદારે કહ્યું કે હકીકત સામે આવી છે કે એક ચોક્કસ કેન્દ્ર પર પરીક્ષા આપી રહેલા 67 વિદ્યાર્થીઓને 720 સુધીના પુરા માર્ક્સ મળ્યા છે.
અરજદારે કહ્યું છે કે પરીક્ષા 5 મેના રોજ યોજાઈ હતી અને ઘણી ફરિયાદો સામે આવી છે જેમાં પેપર લીકનો આક્ષેપ કરવામાં આવ્યો છે. આ મામલે સુપ્રીમ કોર્ટમાં પહેલાથી જ બે અરજીઓ પેન્ડિંગ છે અને પેપર લીકના આધારે પરીક્ષા રદ કરવાની વિનંતી કરવામાં આવી છે. સુપ્રીમ કોર્ટે પહેલી અરજી પર સુનાવણી દરમિયાન નોટિસ પણ જારી કરી હતી, જો કે ત્યારબાદ સુપ્રીમ કોર્ટે પરિણામ પર સ્ટે આપવાનો ઈન્કાર કરી દીધો હતો.
NEET કાઉન્સિલિંગ પર પ્રતિબંધ મૂકવાની માંગ
વર્તમાન પિટિશન તેલંગાણા અને આંધ્રપ્રદેશના રહેવાસી અબ્દુલ્લા મોહમ્મદ ફૈઝ અને શંક રોશન મોહિદ્દીન દ્વારા દાખલ કરવામાં આવી છે. અરજીમાં કહેવામાં આવ્યું છે કે વિદ્યાર્થીઓના હિત માટે આ અરજી દાખલ કરવામાં આવી છે. આ મામલાની તપાસ ન થાય ત્યાં સુધી NEET UG 2024 ની કાઉન્સિલિંગ પર રોક લગાવવા માટે સુપ્રીમ કોર્ટને વિનંતી કરવામાં આવી છે. એવું પણ કહેવામાં આવ્યું છે કે પરીક્ષામાં ગેરરીતિના કેસની તપાસ SIT દ્વારા થવી જોઈએ અને આ માટે એક વિશેષ તપાસ ટીમ (SIT)ની રચના કરવામાં આવે.
