GST Collection : સરકારે એપ્રિલ 2024માં ગુડ્સ એન્ડ સર્વિસ ટેક્સ એટલે કે GSTમાંથી રેકોર્ડ 2.10 લાખ કરોડ રૂપિયા એકત્ર કર્યા છે. અત્યાર સુધીના કોઈપણ મહિનામાં આ સૌથી વધુ જીએસટી કલેક્શન છે. અગાઉનું હાઇએસ્ટ કલેક્શન રૂ. 1.87 લાખ કરોડ હતું, જે એપ્રિલ 2023માં થયું હતું.
વાર્ષિક ધોરણે GST કલેક્શનમાં 12.4%નો વધારો થયો છે. જ્યારે ગયા મહિને એટલે કે માર્ચ 2024માં GST કલેક્શન 1.78 લાખ કરોડ રૂપિયા હતું. એટલે કે મહિના દર મહિનાના આધારે કલેક્શનમાં 18%નો વધારો થયો છે. સરકારે 18 હજાર કરોડ રૂપિયાના રિફંડ જારી કર્યા. રિફંડ પછી, એપ્રિલ 2024 માટે ચોખ્ખી GST આવક ₹1.92 લાખ કરોડ હતી. જે ગયા વર્ષના સમાન સમયગાળા એટલે કે એપ્રિલ 2023 કરતાં 17.1% વધુ છે
નાણા મંત્રાલયના જણાવ્યા અનુસાર, એપ્રિલ માટે ₹2,10,267 કરોડના GST સંગ્રહમાંથી CGST ₹43,846 કરોડ અને SGST ₹53,538 કરોડ હતો. IGST રૂ. 99,623 કરોડ હતો (માલની આયાત પર એકત્ર કરાયેલ રૂ. 37,826 કરોડ સહિત) અને સેસ રૂ. 13,260 કરોડ હતો. સેસમાં માલની આયાતમાંથી મળેલા રૂ. 1008 કરોડનો સમાવેશ થાય છે.
GST 2017માં લાગુ કરવામાં આવ્યો હતો
GST એક પરોક્ષ કર છે. અગાઉના વિવિધ પરોક્ષ કર (VAT), સેવા કર, ખરીદી કર, આબકારી જકાત અને અન્ય ઘણા પરોક્ષ કરને બદલવા માટે 2017માં તેનો અમલ કરવામાં આવ્યો હતો. GSTમાં 5, 12, 18 અને 28%ના ચાર સ્લેબ છે.
