નવી દિલ્હીઃ કેન્દ્રીય નાણામંત્રી નિર્મલા સીતારમણના બજેટથી રતન ટાટાની કંપની ટાઇટનને ઘણો ફાયદો થયો છે. સોના અને ચાંદી પરના આયાત કરમાં 6 ટકાના ઘટાડાને કારણે ટાઇટનના શેરમાં લગભગ 7 ટકાનો વધારો જોવા મળ્યો હતો. તેના કારણે કંપનીના મૂલ્યાંકનમાં એક જ દિવસમાં અંદાજે રૂ. 19,000 કરોડનો વધારો થયો છે. બજેટમાં આ જાહેરાત બાદ ટાઇટનના શેરમાં સતત વધારો જોવા મળી રહ્યો છે.આ સમાચાર શેરબજાર અને ટાઇટનના રોકાણકારો માટે ખૂબ જ પ્રોત્સાહક છે. BSE ડેટા અનુસાર, બુધવારે ટાઇટનનો શેર 4.80 ટકાના વધારા સાથે રૂ. 3,472.95 પર બંધ થયો હતો. ટ્રેડિંગ દરમિયાન એક સમયે આ શેર વધીને રૂ. 3,552.95ના ઉચ્ચ સ્તરે પહોંચી ગયો હતો. નિષ્ણાતોનું માનવું છે કે આગામી દિવસોમાં કંપનીના શેરમાં વધુ ઉછાળો આવી શકે છે.
જ્વેલરી બ્રાન્ડ તનિષ્કથી ફાયદો
ટાઇટનની સફળતાનું મુખ્ય કારણ તેની જ્વેલરી બ્રાન્ડ તનિષ્ક છે. તનિષ્કને સોના અને ચાંદી પરની આયાત ડ્યૂટીમાં ઘટાડાથી ઘણો ફાયદો થવાની અપેક્ષા છે. તેની સીધી અસર ટાઇટનના શેર પર જોવા મળી રહી છે.
મંગળવારે, બજેટના દિવસે, ટાઇટનનું માર્કેટ કેપિટલાઇઝેશન રૂ. 2,88,757.16 કરોડથી વધીને રૂ. 3,07,897.56 કરોડ થયું હતું. આનો અર્થ એ થયો કે કંપનીના મૂલ્યાંકનમાં રૂ. 19,140.4 કરોડનો વધારો થયો છે.
સોના અને ચાંદી પર કસ્ટમ ડ્યુટી ઘટાડવાની જાહેરાત
નાણાપ્રધાન નિર્મલા સીતારમણે મંગળવારે સોના અને ચાંદી પરની મૂળભૂત કસ્ટમ ડ્યૂટી ઘટાડીને 6 ટકા અને પ્લેટિનમ પર 6.4 ટકા કરવાની દરખાસ્ત કરી હતી. સોના, ચાંદી અને પ્લેટિનમ પરની કસ્ટમ ડ્યુટીમાં ઘટાડો એ જેમ્સ અને જ્વેલરી ઉદ્યોગની લાંબા સમયથી માંગ હતી. આ નિર્ણય બાદ દેશના વાયદા બજારમાં સોનાના ભાવમાં 5 ટકાથી વધુનો ઘટાડો થયો છે. જ્યારે કારોબાર દરમિયાન ચાંદીમાં રૂ.5,000થી વધુનો ઘટાડો જોવા મળ્યો હતો. નિષ્ણાતોનું માનવું છે કે આ નિર્ણયથી સામાન્ય લોકોને ઘણી રાહત મળશે.
